საქართველოს ეროვნული პლატფორმა პროტესტს გამოხატავს ანტიკორუფციული ბიუროს მიერ “განცხადებული საარჩევნო მიზნის მქონე სუბიექტებად” ორი არასამთავრობო ორგანიზაციის: “საერთაშორისო გამჭვირვალობა საქართველოს” და “აირჩიე ევროპას” და ამ ორგანიზაციებთან დაკავშირებული ფიზიკური პირების გამოცხადებასთან დაკავშირებით. ბიურო ამ ორგანიზაციებს და ფიზიკურ პირებს ავალდებულებს, ხუთი დღის ვადაში წარადგინონ ფინანსური ანგარიშები გაწეული ხარჯებისა და მიღებული შემოსავლების შესახებ, იმ საბანკო ანგარიშების რეკვიზიტების შესახებ, რომლებიც გამოიყენება მათ საარჩევნო მიზნებთან დაკავშირებული შემოსავლებისა და ხარჯებისთვის, ასევე, უწესებს სხვა ვალდებულებების შესრულებას.